Dalai Lama Zergatik Barre Egiten Dut

Bizitzan zehar zailtasun askorekin tokatu zait, eta nire herrialdea aldi larria igarotzen ari da. Baina askotan barre egiten dut, eta nire barrea kutsakorra da. Jendeak orain barre egiteko indarra nola aurkitzen dudan galdetzen didanean, barre profesional bat naizela erantzuten diot. [...]

Erbesteko bizitza zorigaiztoko bizitza da, baina beti saiatu naiz gogo-egoera zoriontsua lantzen, bizileku finkaturik gabeko existentzi honek, protokolo guztietatik urrun, eskaintzen dizkidan aukerak balioetsiz. Horrela nire barneko bakea gorde ahal izan dut.

Errukia, arrazionaltasuna eta pazientzia onak direla pentsatzearekin konformatzen bagara, hori ez da nahikoa ezaugarri horiek garatzeko. Zailtasunek praktikan jartzeko aukera ematen dute. Nork sor ditzake horrelako kasuak? Zalantzarik gabe, ez gure lagunak, baizik eta gure etsaiak, haiek baitira arazo gehien sortzen dituztenak. Bidean benetan aurrera egin nahi badugu, gure etsaiak gure irakasle hoberentzat hartu behar ditugu.

Maitasuna eta errukia aintzat hartzen dituenarentzat, tolerantzia praktikatzea ezinbestekoa da, eta etsaia behar du. Gure etsaiei eskerrak eman behar dizkiegu, beraz, adimen lasaia sortzen laguntzen digutelako! Amorrua eta gorrotoa dira aurrez aurre eta garaitu behar ditugun benetako etsaiak, ez gure bizitzan noizean behin agertzen diren “etsaiak”.

Noski, naturala eta zuzena da guztiok lagunak izan nahi ditugula. Askotan esaten dut txantxetan pertsona benetan berekoi batek altruista izan behar duela! Besteak zaindu behar dituzu, haien ongizatea, lagunduz eta zerbitzatuz, are lagun gehiago izan eta irribarre gehiago loraraziz. Emaitza? Zuk zeuk laguntza behar duzunean, behar duzun guztia aurkituko duzu! Bestalde, besteen zoriontasuna alde batera uzten baduzu, galtzaile izango zara epe luzera. Laguntasuna eztabaidatik, haserretik, jeloskortasunetik eta neurririk gabeko lehiatik sortzen da? Ez dut uste. Afektuak bakarrik sortzen ditu benetako lagunak. […]

Niri dagokionez, beti nahi dut lagun gehiago. Irribarreak maite ditut, eta nire nahia irribarre gehiago ikustea da, benetako irribarreak, mota asko baitaude —sarkastikoak, artifizialak edo diplomatikoak—. Irribarre batzuek ez dute asebetetzerik sortzen, eta beste batzuek susmoa edo beldurra ere sortzen dute. Benetako irribarre batek, ordea, benetako freskotasun sentsazioa pizten du, eta irribarrea gizakiena baino ez dela iruditzen zait. Irribarre horiek nahi baditugu, agertzeko arrazoiak sortu behar ditugu.

-- Dalai Lama, "Nire bidaia espirituala" liburuko pasarte batean.